Tuvalu: Laaste soewereine staat om deurgaans sonder Covid-19 te wees?

Sedert beriggewing op 2 April 2022 oor die eerste gevalle in Nauru[1], en steeds effektief op 16 April 2022[2], het 189 van die 193[3] lidstate (soewereine state) van die Verenigde Nasies een of meer gevalle van covid-19 aangemeld (afhanklike gebiede uitgesluit). Aldus die Wêreldgesondheidsorganisasie (WGO). Die vier uitsonderings is die Gefedereerde State Mikronesië, Demokratiese Volksrepubliek Korea (ook bekend as Noord-Korea), Turkmenistan en Tuvalu.

Noord-Korea[4] en Turkmenistan[5] se status as deurgaans covid-19-vry word in twyfel getrek deur sommige analiste. Die omstandighede rondom ŉ spesifieke covid-19-geval rakende die Gefedereerde State Mikronesië blyk gekompliseerd, sodanig dat ŉ aanvanklike aanmelding later teruggetrek is[6].

Dit laat eintlik net die afgeleë Stille Oseaan eiland Tuvalu oor, ŉ stel van drie rifeilande en ses ringeilande ongeveer halfpad tussen Hawaii en Australië. Die nege eilande beslaan saam maar ŉ skamele 26 km² grondgebied[7].

Dit is ŉ Statebondsryk, dus een van die 15 onafhanklike state waar die Britse monarg as staatshoof dien, soos onder andere Kanada, Australië, Nieu-Zeeland en Brittanje self. Sy ongeveer 12,000 inwoners gebruik die inheemse Tuvaluaans as eerste taal, alhoewel die voormalige koloniale taal Engels ook amptelike status het. Die Britse Unievlag pryk in die boonste hoek teen die vlagpaalkant van die nasionale vlag, soos ook by die vlae van Australië en Nieu-Zeeland. Daarby het die vlag nege sterre gerangskik soos die eilande van Tuvalu op die kaart, maar met Oos bo (dus Noord links, Suid regs en Wes onder) [8].

Hul Volkslied se titel (ook die wapenleuse) heet aangrypend in vertaling: Tuvalu vir die Almagtige. Byna die hele bevolking is lidmate van die 18 plaaslike kerke binne die nasionale tradisioneel Calvinistiese kerkverband, die Kongregasionele Christelike Kerk van Tuvalu[9]^,[10].

Tuvalu word deur die Verenigde Nasies ingesluit in die kategorie Minste Ontwikkelde Lande, en is grootliks afhanklik van die finansiële steun van meer welvarende moondhede. Meeste Tuvaluane werk as staatsamptenare, met heelwat burgers wat in die buitelandse skeepsvaart werksaam is, terwyl kleiner dele van die arbeidsmag hulself met beperkte landbou en vissery-bedrywighede aan die lewe hou. Die land se internettopvlakdomein is .tv (eweknie van Suid-Afrika se .za). ŉ Belangrike bron van inkomste vir die Tuvaluaanse regering is die verhuur van hul topvlakdomein aan televisiestasies reg oor die wêreld. Ook die verkoop van vissery-lisensies in Tuvalu se 200 km uitsluitlike ekonomiese sone, genereer belangrike inkomste. Daarby is die posseëls van Tuvalu tot so ŉ mate gesog dat dit nog ŉ noemenswaardige inkomste bron vir die owerhede uitmaak. Alhoewel daar munte (maar nie note nie) bestaan vir die rekenkundige geldeenheid, die Tuvaluaanse Dollar, gebruik hulle in praktyk die Australiese Dollar, waarteen die Tuvaluaanse Dollar in een-tot-een verhouding gehou word[11].

Moeilik bereikbare Tuvalu kry maar min toeriste, maar die belangrikste besienswaardigheid is die Funafuti Bewaringsgebied – sowat 33 km² van koraalriwwe en strandmere, insluitende so ŉ sestal piepklein mens-onbewoonde eilandjies waar seeskilpaaie en eksotiese seevoëls hul neste maak. Die tropiese klimaat sluit hewige reënstorms van veral Oktober tot Maart in. Die res van die jaar is meer gematig. Om hierby uit te kom moet mens van Auckland in Nieu-Zeeland, of Sydney in Australië vlieg met aansluitingsvlug in Fidji[12]^{,[13],[14],[15]}.