Die afgelope paar dae het Maroela Media twee ontstellende berigte gepubliseer. In die eerste berig, bespreek Elaine Krige hoe skole met geslagsvoornaamwoorde wil wegdoen. Soos elders in die wêreld is dit te verwagte dat aparte badkamers ook gou iets van die verlede mag wees.
In die tweede berig bespreek Nico Strydom hoe die Wes-Kaapse departement van onderwys ‘n “diversiteitskurses oor rassisme” by Hoërskool Vishoek aangebied het. Hierdie kurses was deurtrek met Marxistiese Kritiese Rasteorie – die leerlinge was so ontsteld dat hulle na die tyd berading moes ontvang. Die 800 leerlinge moes sonder die toesig van onderwysers of ouers hoor hoe slegs wit mense rassiste kan wees en daar was ‘n sterk aanval op Christenskap.
Christelike ouers moet gevolglik nugter dink oor die opvoeding van hul kinders – die verantwoordelikheid vir die opvoeding van kinders lê uiteindelik by die ouers (Ef 6:4; Deut 6: 6-7). Ons opdrag as ouers, veral vaders, is soortgelyk as die herderlike opdrag aan Petrus: om die lammers te laat wei (Joh 21: 16), eerder as om hulle aan die wolwe te voer.